Qualques escorregudas polidas que podètz far a l’entorn de Montsegur, mai d’entresenhas de trobar sul topo-guida vendut al Musèu arqueologic :

Lo torn del pòg :

Un camin polit e aisit que permet de far lo torn del pòg a distància e balha punts de vista originals (durada 2 oradas).
Es aconselhat de partir del parcatge del castèl e de s’encaminar sul « camin dels teisseires », a la roïna de « Pechiquelha » prene a man dreita cap a Sèrralonga puèi tornar per la rota dins la frau de Carolet e lo « camin dels purs ».

Pic de Sant Bertomieu (2.348 m) e Pic de Solarac (2.368 m) :

Son los soms mai nauts del massís de Tava que cintan la val de Montsegur.
5 oras 30 per i arribar, e caminatz primièr a l’ombra d’una fraisseta, puèi dins de penjals rocalhuts d’abardals e d’avets.
Mai amont remiraretz los lacs de blau prigond e la cadena dels Pirenèus. Una montanha encara aparada de l’accion de l’òme que i encontraretz isards, cabiròls e rapaces d’altitud.

La Jaça de Premaut :

2 oras de caminada vos menaràn a una jaça que tresplomba lo fons de la val de Montsegur. D’aquí poiretz remirar lo castèl de Montsegur crincat sus son turron amb en bas lo vilatge de Montsegur.

La Canaleta :

1 ora 30 de caminar per arribar sus d’ermasses montanhòls amb gençana, agrèu, sorbièrs, e qu’i trobaretz un punt de vista sus la montanha de la Frau (contrafòrts èst del massís de Tava), lo còl de la Pèira, lo Solarac e lo Sant Bertomieu.

Lo torn del Ròc de la Mossa :

Una virada en doas oras de caminada, amb un passatge malaisit sus un penjal ribassut. Descobriretz a bas la frau de Carolet e, en fàcia, lo Ròc de la Tor, un acrin rascanhut qu’i passèron los assietjants al mes de decembre de 1243 e que permetèc, unas setmanas puèi, la presa del castèl.

Per una pichona passejada en familha, podètz aisidament seguir lo riu Lacet. I poiretz remirar una flòra rica e, se vos sabètz far plan fins, benlèu i veiretz qualques troitas.

> Per ne saber mai

www.ariege-pyrenees-cathares.fr
www.ariegepyrenees.com
www.ariegenature.fr