Una tèrra de contrastes
Al mièg del Massís de Tava, la resèrva naturala regionala del Sant Bertomieu s’espandís sus 500 ectaras sus la comuna de Montsegur. Se tròba a l’ubac de la pica de Solarac (2368m), som mai naut de las montanhas nòrd-pirenencas.
Lo duò de las picas de Solarac e de Sant Bertomieu que se veson de Tolosa a Carcassona en passant per la Montanha Negra e los soms mai nauts de Coserans, es lo bèlvéser mai famós dels Pirenèus catars. Plan conegut pels caminaires, ofrís un panorama sens parièr sus la cadena dels Pirenèus, de la Mediterranèa als 3000 m dels Pirenèus centrals.
Massís de terrens primaris, la resèrva naturala es atraversada per la falha de Trimons, còr de la veta de talc, espleitada a descobèrt, qu’es una de las carrièras mai grandas del mond. Es despartida dins dos sectors geologics desparièrs : al ponent, lo de las migmaticas (« mescladís » de barena e de gneis) e al levant lo dels calcaris dolomitics (ròcas sedimentàrias plan vièlhas).
Un concentrat dels Pirenèus
Fòrta de sas caracteristicas geograficas e geologicas, la resèrva naturala, que cor sus mai de 1000 m de desnivèl del gra montanhòl al gra alpin, amassa suls 500 ectaras una varietat excepcionala de mitans naturals.
Arrapats als crestes del Sant Bertomieu e del Solarac, los pelencs alpins e las landinas rasas bravan lo mond mineral dels bauces e dels esbolhs. Los rius de Lacet e de Fontfreda que naisson suls penjals del Pic de Solarac passan los replanats e las barras glaciàrias successivas per formar estanhs, lacs e sanhas, tresòrs de la resèrva naturala. Suls penjals, lo pin de montanha se mescla a las landas de brucs e d’abardals e costeja las landas de reguèrgues.
A l’èst del Solarac, lo relèu s’adoça per formar vals dubèrtas dels soms arredondits. Se tròba per las combas de Pratmau e dels Mosquièrs una mosaïca de landas montanhòlas e de pelencs de nard que sa riquesa floristica se manten, per la practica dempuèi sègles e sègles, de las estivas de las vacas. La resèrva naturala es bornada a l’èst pel Sarrat de Caudaval. Aquí, i a plan mens d’aiga, i agèt pas que los pelencs rases per s’abastar de la secada e l’altitud d’aquela montanha calcària, paradís vertadièr per la flòra e los parpalhons.
Contacte :
Maison de la réserve
104 ter village
09300 MONTSEGUR
Tel.: 05 61 65 44 82
Siti internet de RNF
www.reserves-naturelles.org/
Per ne saber mai
www.ariegenature.fr/les-missions/rnr/
Programa de las animacions
www.ariegenature.fr/activites/
Ficha d’identitat
Nascuda de l’iniciativa e de la volontat de la Comuna de Montsegur, la resèrva naturala regionala dels Massís del Sant Bertomieu es la primièra resèrva naturala d’Arièja. 13ena resèrva regionala de la region Occitània, fa part de las 350 resèrvas naturalas de França:
• Data de creacion : 18 de novembre de 2015
• Espandida : 500 ectaras
• Altitud : de 1300 m a 2368 m (Pic de Solarac)
• Gestionaris : Comuna de Montsegur e Associacion dels Naturalistas d’Arièja
Flòra patrimoniala
Mai de 500 espècias de flors que 2 son protegidas al nivèl nacional, l’Androsassa de Vandelli e la Drosera de fuèlhas redondas o arrapamoscas e 1 espècia de proteccion regionala, l’erifòr o plumacho.
Fauna patrimoniala
Los 3 gallifòrmas dels Pirenèus (Pol lambèrt, Perdritz grisa dels Pirenèus, Perdritz blanca -Gelabre), lo Giapèt, l’Agla reiala, lo Mèrle roquièr, lo Desman, lo Gat fèr, lo Gafolh dels Pirenèus, l’anglòra (un lausèrt vivipar), la Leucorrhinia dubia (una domaisèla de las sanhas) e plan de parpalhons de montanha lo Parnassius Apollo, e lo Parnassius mnemo.
Reglementacion
Una resèrva naturala es un espaci protegit somés a una reglamentacion adaptada que respècta l’environa locala. Aquelas règlas son d’utisses per aparar dins lo temps aquel territòri excepcional. Es primièr un afar de sens e de civisme.
